2.6 მილიონი დოლარი 24 საათში. ეს არ არის მორიგი სტარტაპის მიერ მოზიდული ინვესტიცია, ეს იმ შეკვეთების ჯამია, რომელიც Hugging Face-ის ახალმა პროდუქტმა გამოსვლისთანავე მიიღო. Microduck 25-სანტიმეტრიანი ბიპედალური რობოტია, რომელიც 399 დოლარი ღირს და ინდუსტრიაში მოლოდინებს სრულად ცვლის.
სანამ იფიქრებთ, რომ სახლში ახალი დამხმარე გამოგიჩნდათ, უნდა იცოდეთ – Microduck სადილს არ მოგიმზადებთ, არც სარეცხს გაფენს და არც ოთახს დაგილაგებთ. ის შექმნილია მოქმედებისთვის. Pollen Robotics-მა, რომელიც Hugging Face-მა შეისყიდა, მანამდე Reachy Mini გამოუშვა და 10,000 მომხმარებელს გაუგზავნა. თუ წინა მოდელი ინტერაქციაზე იყო გათვლილი, იხვის მთავარი მიზანია დეველოპერებს ფიზიკური ხელოვნური ინტელექტის განვითარების საშუალება მისცეს. მისი ამოცანა მარტივია: დაწერეთ ქცევა სიმულაციაში, გადაიტანეთ რეალურ ტექნიკურ ნაწილში (sim-to-real), ნახეთ რა არ მუშაობს და სცადეთ თავიდან.
რობოტიკაში მოძრაობის სწავლა საკმაოდ ქაოსური პროცესია. დიდი ზომის ჰუმანოიდებზე ნებისმიერი წარუმატებელი ნაბიჯი ძვირი ჯდება და ხშირად სახიფათოცაა. 800 გრამზე ნაკლები წონის Microduck კი უბრალოდ მაგიდაზე ეცემა და რაც მთავარია, წამოდგომა თავადვე შეუძლია. აღარ გიწევთ ყოველი დაცემის შემდეგ რობოტის ხელით გასწორება, რაც სატესტო გარემოში მუშაობას აჩქარებს. ის იმდენად კომპაქტურია, რომ ორ ლეპტოპს შორის თავისუფლად ეტევა.
რობოტს 15 ძრავი, კამერა, სიღრმის სენსორი, ორი IMU და მოძრავი ნისკარტი აქვს, რომლითაც მცირე ზომის ნივთების აღება შეუძლია. მას მარტივად გამოსდის სიარული, დაჯდომა, ჩაცუცქვა და გორგოლაჭებით სრიალიც კი. იხვის პერსონაჟი მისი პროპორციებიდან და სიარულის მანერიდან გამომდინარეობს. ის მეგობრული დიზაინისაა, თუმცა მექანიკურ დეტალებს არ მალავს. რობოტი სიტყვებს არ ამბობს, სამაგიეროდ უცნაურ, სახალისო ხმებს გამოსცემს და ყოველ მათგანს ჩართვისთანავე თავისი უნიკალური ხმოვანი იდენტობა ენიჭება.
Microduck პირველ რიგში სახალისოა. შეგიძლიათ მართოთ გეიმპედით, ატაროთ ლაზერის მიმართულებით და დააკვირდეთ, როგორ რეაგირებს გარემოზე. თუმცა, მისი მთავარი ღირებულება პროგრამული უზრუნველყოფის ღია კოდია. სიმულაცია, კონტროლი და განმტკიცებითი სწავლების (reinforcement learning) გარემო GitHub-ზე სრულად არის ხელმისაწვდომი. აქვე უნდა აღინიშნოს, რომ რობოტის ფიზიკური დიზაინი და აპარატურა ღია არ არის – ის 3D პრინტერზე დასაბეჭდი ნაკრები არ არის და მას ქარხნულად ამზადებენ. როდესაც რამდენიმე რობოტი ერთადაა, ისინი განსხვავებულ პერსონაჟებს გვანან და შეჯიბრებების ან ფეხბურთის თამაშიც შეუძლიათ.
Hugging Face-ის CEO-მ, კლემ დელანგმა პროდუქტის გამოსვლისას აღნიშნა, რომ კეთილი იყოს თქვენი მობრძანება ხელმისაწვდომი ღია კოდის რობოტების ერაში, რომელიც ფიზიკური AI-ს დემოკრატიზაციას მოახდენს.
მომხმარებელთა ინტერესი იმდენად დიდი აღმოჩნდა, რომ Hugging Face-ის თანადამფუძნებელმა, ტომას ვულფმა X-ზე დაწერა, რომ პირველ 24 საათში 2.6 მილიონ დოლარზე მეტი ღირებულების შეკვეთები მიიღეს. ამჟამად პლატფორმაზე საშობაო მარაგი უკვე სრულად ამოწურულია. ახალი მომხმარებლები Microduck-ის შეძენას ოთხ ფერში – კრემისფერში, გრაფიტისფერში, ლავანდისფერსა და ცისფერში შეძლებენ, თუმცა ახალი შეკვეთების მიწოდებას 4-6 თვე დასჭირდება.
წყარო: TechCrunch, Business Insider, Pollen Robotics
