10 წელზე მეტი კვლევა და განვითარება დასჭირდა იმას, რომ ბაქტერიების მიერ შექმნილი მასალა ინტერიერის ობიექტად ქცეულიყო. მექსიკურმა ბიოტექნოლოგიურმა კომპანიამ Polybion-მა და დიზაინსტუდია Natural Urbano-მ ძალები გააერთიანეს და წარმოადგინეს Cenit, შეკვეთით შექმნილი განათების კოლექცია, რომლის აბაჟურებიც ცოცხალი ორგანიზმების მიერ გამოზრდილი ცელულოზისგან მზადდება.
ამ მასალას Celium ჰქვია. ის ბაქტერიული ცელულოზაა, რომელსაც აგროინდუსტრიული ხილის ნარჩენებისგან გამოზრდილი ბაქტერიები აწარმოებენ. მიკროორგანიზმები ცელულოზას უწყვეტ ფენებად აფორმირებენ. ამის შემდეგ მოსავლის აღება იწყება, რასაც სისქის, მოქნილობის, ფაქტურის, ფერის, შეგრძნებისა და გამძლეობის დახვეწის პროცესი მოსდევს. მთელი ციკლი, ხილის გადამუშავებიდან საბოლოო ნაწარმის მიღებამდე, სრულად ინტეგრირებულია.
„ჩვენი მუშაობა მიმართული იყო იქითკენ, რომ ეს ბიოლოგიური შესაძლებლობა გვექცია მასალის პლატფორმად, რომლის სტაბილურად წარმოება, სხვადასხვა დანიშნულებისთვის მორგება და მრავალი ინდუსტრიის პროდუქტებსა თუ ღირებულების ჯაჭვებში ინტეგრირება იქნებოდა შესაძლებელი“, ამბობს Polybion-ის თანადამფუძნებელი Alexis Gómez-Ortigoza.
თავად მასალა რამდენიმე ვარიაციით მზადდება: Manto არის მსუბუქი, ნახევრად გამჭვირვალე და ელასტიკური, ხოლო Espumante უფრო მკვრივი, ქაფისებრი სტრუქტურისაა. Cenit-ის მაგიდის სანათებში ასევე გამოიყენება Celium Keros / Espumante, როგორც უფრო მკვრივი ტექსტურული გამოხატულება.
Cenit-ის კოლექცია მოიცავს როგორც დაკიდებულ, ისე მაგიდის სანათებს. მათი ვიზუალი 1970-იანი წლების ხაზოვან კომპოზიციებსა და ოქროსფერ ჰორიზონტებს ეფუძნება, ხოლო თავად სახელწოდება Cenit ცაზე დამკვირვებლისთვის უმაღლეს წერტილს აღნიშნავს.
კონსტრუქციულად, ბუნებრივი იფნის ხის თხელი ფურცლები ერთმანეთზეა დაწნეხილი და დაჭედებული, რაც ცენტრალურ ხერხემალს ქმნის. Celium Manto-ს აბაჟური იფნის ხის ოთხ-ოთხ ფენას შორისაა მოქცეული თითოეულ მხარეს, ჯამში კი რვა ფენას შორის. დეტალები უჟანგავი ფოლადისგანაა შესრულებული. ეს არის Polybion-ისა და Natural Urbano-ს პირველი ერთობლივი ნამუშევარი, რომელიც ერთდროულად აერთიანებს ხეს, უჟანგავ ფოლადსა და Celium Manto-ს.
„როდესაც სანათი ჩართულია, მასალა ავლენს გრადიენტებს, ტექსტურასა და სითბოს. როდესაც ის გამორთულია, Celium ინარჩუნებს ძლიერ ფიზიკურ ყოფნას თავისი ზედაპირითა და ფორმით“, აღნიშნავს Alexis Gómez-Ortigoza.
ეს ამ პარტნიორობის პირველი ექსპერიმენტი არ არის. 2025 წელს გუნდმა წარადგინა სკულპტურული სანათი Lapso, რომელშიც ხუთი გამოზრდილი ფენა გამოიყენეს. ის Celium-ის ინტერიერის განათებაში გამოყენების პირველი პრეცედენტი გახდა London Design Festival-ზე, Biofab Fair-ის ფარგლებში. Celium კომერციულად ჯერ კიდევ 2024 წელს გამოჩნდა, როგორც ტყავის ალტერნატივა. მას ირაპუატოში, გუანახუატოში მდებარე მზის ენერგიაზე მომუშავე ქარხანაში აწარმოებენ, ხილის გადამამუშავებელი ინდუსტრიის სიახლოვეს. ფურცლების ბუნებრივი ვარიაციები კი დეფექტად კი არა, დიზაინის მთავარ მახასიათებლად მიიჩნევა.
დიზაინზე ერთობლივად იმუშავეს Lorena Márquez-მა, Sebastián Beltrán-მა (Natural Urbano), Axel Gómez-Ortigoza-მ და Alexis Gómez-Ortigoza-მ (Polybion). Cenit-ის თითოეული ეგზემპლარი მხოლოდ შეკვეთით მზადდება, მიწოდების სავარაუდო დრო კი დაახლოებით ხუთი კვირაა. სანათების შეძენა შესაძლებელია Natural Urbano-ს ოფიციალურ საიტსა და Vibe Lab / Polybion-ის Shopify პლატფორმაზე.
წყარო: This design studio spent 10 years perfecting a lampshade made out of bacteria | Fast Company, cultivated cellulose and layered ash shape series of horizon-inspired lighting | Designboom, Polybion and Natural Urbano Turn Bacteria-Grown Cellulose Into Made-to-Order Lighting With Cenit | Cultivated X
