ბერლინში მიმდინარე ტექნოლოგიურ გამოფენაზე, IFA 2026-ზე, ჭკვიანი მოწყობილობების გლობალურმა პლატფორმამ, Tuya Smart-მა, ახალი პერსონალური რობოტი Doova ოფიციალურად წარადგინა. მოწყობილობა სპეციალურად იმ ხანდაზმული ადამიანებისთვის შეიქმნა, რომლებიც დამოუკიდებლად, მარტო ცხოვრობენ, თუმცა ყოველდღიურობაში მუდმივი მხარდაჭერა და უსაფრთხოების სანდო გარანტიები სჭირდებათ. Doova ერთდროულად სამ მთავარ როლს ასრულებს: ის არის საგანგებო სიტუაციებზე მყისიერი რეაგირების სისტემა, ყოველდღიური საქმეების პერსონალური ასისტენტი და ჭკვიანი სახლის მართვის ცენტრი.
მოწყობილობის მთავარი ყურადღება უსაფრთხოებასა და ექსტრემალურ სიტუაციებზეა გამახვილებული. Doova აღჭურვილია LiDAR-ის ზუსტი სენსორით, ხმის ლოკალიზაციის ოთხმიკროფონიანი სისტემითა და ადამიანის ჩონჩხის ამოცნობის ხელოვნური ინტელექტით (AI skeletal recognition). ეს სენსორული ბაზა რობოტს საშუალებას აძლევს, სახლის სივრცეში ადამიანის მდებარეობა და მისი ფიზიკური მდგომარეობა ზუსტად გააანალიზოს. როდესაც ადამიანი დასახმარებლად დაიძახებს, Doova ხმის წყაროს წამებში აფიქსირებს, ადამიანის გვერდით მიდის და შექმნილ სიტუაციას ადგილზე აფასებს. თუ მომხმარებელი რობოტის მიმართვას 60 წამის განმავლობაში არ უპასუხებს, სისტემა დაუყოვნებლივ იწყებს გადაუდებელი დახმარების პროცესს და ოჯახის წევრების ტელეფონებზე ორმხრივ პირდაპირ ვიდეოზარს რთავს.
ვიზუალური კომუნიკაციისთვის მოწყობილობა 10,1-ინჩიან ეკრანს იყენებს. რობოტის ერგონომიკა და ხედვის კუთხეები ისეა შერჩეული, რომ მომხმარებელს მასთან ინტერაქცია თანაბრად კომფორტულად შეუძლია მაშინაც კი, როდესაც ის ფეხზე დგას, სავარძელში ზის ან საწოლში წევს.
Doova-სთან საუბარი და კომუნიკაცია მულტიმოდალური დიდი ენობრივი მოდელით იმართება, რაც დიალოგს ცოცხალ და ბუნებრივ ელფერს აძლევს. რობოტი მზადაა შეასრულოს უამრავი ყოველდღიური დავალება: შეახსენოს ადამიანს მედიკამენტების მიღება ან დაგეგმილი საქმეები, გააცნოს ამინდის პროგნოზი, შეადგინოს დღის განრიგი ან გაართოს მსუბუქი თამაშებით. ამასთან ერთად, Doova პრაქტიკულ საყოფაცხოვრებო საკითხებშიც ერთვება: რობოტს შეუძლია წაიკითხოს და ადამიანს მარტივად აუხსნას კომუნალური ქვითრები ან ოფიციალური წერილები, ასევე დროულად დააფიქსიროს შესაძლო თაღლითური რისკები და ამის შესახებ მფლობელი გააფრთხილოს. დროთა განმავლობაში სისტემა მფლობელის გემოვნებასა და ჩვევებსაც იმახსოვრებს და ამის მიხედვით სთავაზობს კერძების რეცეპტებს, რჩევებს მცენარეების მოვლასა თუ ჩაცმულობაზე. სამომავლოდ დეველოპერები რობოტში დაკარგული ნივთების მოძიების ფუნქციის დამატებასაც გეგმავენ.
ოთახებს შორის გადასაადგილებლად Doova ორბორბლიან ამძრავსა და დამატებით ბორბლებს (casters) იყენებს. ენერგიის ამოწურვისას მოწყობილობა დამტენ სადგურზე დამოუკიდებლად ბრუნდება. როდესაც მფლობელი სახლიდან გადის, რობოტი Away რეჟიმზე გადადის, ოთახიდან ოთახში მოძრაობს, სივრცეს 360 გრადუსით ასკანერებს და უსაფრთხოების დეტალურ ანგარიშებს სმარტფონში აგზავნის.
გარდა ამისა, Doova სრულად ინტეგრირდება Tuya AIoT პლატფორმასთან და ჭკვიანი სახლის მთავარი ჰაბის როლს ასრულებს. ხმოვანი ბრძანებებით მას შეუძლია მართოს ოთახის განათება, ფარდები, ასევე სამზარეულოსა და სააბაზანოს სხვადასხვა ტექნიკა.
IFA 2026-ზე წარდგენის მიუხედავად, კომპანიას Doova-ს საბოლოო ფასი და გაყიდვების დაწყების ზუსტი თარიღი ჯერჯერობით არ გამოუცხადებია.
წყარო: The AI Insider
