სოციალური მედიის მომხმარებლებისთვის მიყენებული ზიანის გამო 18 მილიარდი დოლარის ოდენობის ჯარიმაზე შეთანხმებიდან ორ კვირაზე ნაკლებ დროში, კომპანია Meta-მ 2026 წლის 8 სექტემბერს ახალი პერსონალური ხელოვნური ინტელექტი, Meta Muse, წარადგინა. მარკ ცუკერბერგის ხედვით, ეს „პერსონალური სუპერინტელექტისკენ“ გადადგმული კიდევ ერთი მნიშვნელოვანი ნაბიჯია. ახალი პროდუქტი, რომელიც კომპანიის შიგნით Hatch-ის სახელით იყო ცნობილი, მხოლოდ შეკითხვებზე პასუხის გასაცემად არ შექმნილა. Meta Muse ნამდვილი ციფრული ასისტენტია, რომელიც თქვენს ნაცვლად რეალურ დავალებებს ასრულებს და ყოველდღიურ რუტინას მნიშვნელოვნად ამარტივებს.
პროდუქტის ფუნქციონალი საკმაოდ მრავალფეროვანია. მას შეუძლია დამოუკიდებლად დაწეროს და გააგზავნოს ელექტრონული წერილები, დაგეგმოს მოგზაურობა, შეავსოს რთული ფორმები და სერვისის პროვაიდერებთან გადასახადების შემცირებაზეც კი აწარმოოს მოლაპარაკება. ასევე, მას შეუძლია სამუშაო გეგმების შედგენა. წარმოიდგინეთ, რომ Instagram-ზე რეცეპტის ვიდეოს უყურებთ. Meta Muse-ს შეუძლია ეს ვიდეო გააანალიზოს და საჭირო ინგრედიენტები პირდაპირ თქვენს საყიდლების სიაში შეიტანოს. ის ასევე მარტივად აგზავნის წვეულების მოსაწვევებს და ახორციელებს შესყიდვებს. აღსანიშნავია, რომ აგენტი მუშაობას მაშინაც აგრძელებს, როცა თქვენ აპლიკაციას ხურავთ. თუმცა, უსაფრთხოების მიზნით, მგრძნობიარე ქმედებების შესრულებამდე, როგორიცაა თანხის გადახდა ან მნიშვნელოვანი ელექტრონული წერილის გაგზავნა, ის ყოველთვის ითხოვს მომხმარებლისგან წინასწარ თანხმობას.
ეს ყველაფერი მუშაობს Meta-ს უახლეს და ამჟამად ყველაზე მძლავრ მოდელზე, რომელსაც Muse Spark ჰქვია. კომპანიის განცხადებით, ეს მოდელი სპეციალურად აგენტური სამუშაოების შესასრულებლად შეიქმნა. რაც შეეხება ტექნიკურ მხარეს, პროცესები მიმდინარეობს სპეციალურ დაცულ ღრუბლოვან სივრცეში, Muse Secure VM-ში. ამ ვირტუალურ მანქანას საკუთარი ბრაუზერი აქვს და სწორედ იქ ინახება მომხმარებლის მონაცემები. მასთან ერთად, იმავე სისტემაში მუშაობს სრულიად განცალკევებული უსაფრთხოების აგენტი, Sentinel. ეს უკანასკნელი აკონტროლებს ყველა მოქმედებას და სანამ Sentinel-ი არ გასცემს დასტურს, ინტერნეტში არანაირი ინფორმაცია არ იგზავნება. კომპანია Meta ხაზგასმით აღნიშნავს, რომ Muse-ს არ აქვს წვდომა მომხმარებლის პაროლებზე ან გადახდის დეტალებზე და მასთან საუბრები და მონაცემები სარეკლამო მიზნებისთვის არ გამოიყენება. 2026 წლის ბოლოსკენ კი კომპანია გვპირდება კიდევ უფრო დაცული, Muse Confidential VM ვერსიის გამოშვებას, სადაც ინფორმაცია ისე იქნება დაშიფრული, რომ მასზე წვდომა თავად Meta-საც არ ექნება.
TechCrunch-ის ჟურნალისტი სარა პერესი თავის სტატიაში აღნიშნავს, რომ მსგავსი ტიპის პროდუქტი მომხმარებლებისგან გაცილებით დიდ ნდობას მოითხოვს, ვიდრე სოციალური მედია. ეს კი განსაკუთრებით საყურადღებოა კომპანიის წარსულის ფონზე. თუ გავიხსენებთ Cambridge Analytica-ს სკანდალს, 2019 წელს მომხმარებელთა კონფიდენციალურობის დარღვევისთვის FTC-ის მიერ დაკისრებულ 5-მილიარდიან ჯარიმას და ახლანდელ 18-მილიარდიან შეთანხმებას, ნდობის მოპოვება მარტივი ნამდვილად არ იქნება. სწორედ ამიტომ, ფინანსური ტრანზაქციების უსაფრთხოებისთვის მნიშვნელოვანი ნაბიჯები გადაიდგა. Stripe-ის ოფიციალური განცხადების თანახმად, საყიდლებისთვის Muse იყენებს მათ Link სისტემას. Meta Muse არის პირველი AI აგენტი, რომელზეც Link-ის შესყიდვების დაცვის მექანიზმი ვრცელდება. სისტემა სპეციალურად აგენტებისთვის აგენერირებს ერთჯერად ვირტუალურ ბარათებს, ამიტომ თქვენი რეალური ბარათის მონაცემები სრულიად დაცული რჩება. მომხმარებელმა მხოლოდ ტრანზაქციის საბოლოო თანხა უნდა დაადასტუროს. უახლოეს მომავალში ასევე დაგეგმილია Shop Pay-სა და 1Password-ის მხარდაჭერის დამატება.
რაც შეეხება ფასებს, Meta-ს საკუთარ ოფიციალურ განცხადებაში თანხები დეტალურად დაკონკრეტებული არ არის. ამ ფაქტზე The Verge-ის ჟურნალისტი რობერტ ჰარტიც ამახვილებს ყურადღებას. თუმცა TechCrunch-ის ინფორმაციით, იარსებებს სერვისის უფასო ვერსია, რომელსაც გამოყენების ლიმიტი ექნება და მისი გააქტიურებისთვის საბანკო ბარათის მითითება მაინც სავალდებულო იქნება. ფასიანი ვერსიები კი ასე ნაწილდება: Power პაკეტი თვეში 20 დოლარი ეღირება, ხოლო მაქსიმალური შესაძლებლობების მქონე Maximum პაკეტის ფასი 100 დოლარი იქნება. თავად Meta-ში ვარაუდობენ, რომ მომხმარებელთა უმეტესობა ძირითადად უფასო ვერსიით შემოიფარგლება.
ამ ეტაპზე ახალი პროდუქტი ხელმისაწვდომია მხოლოდ ამერიკის შეერთებულ შტატებში. მისი გამოყენება შესაძლებელია iOS და Android ოპერაციულ სისტემებზე, ვებგვერდზე muse.ai-სა და WhatsApp-ის ჩატებში. კომპანიის თქმით, ეს ფუნქცია მალე Meta-ს AI სათვალეებსაც დაემატება. მომხმარებლებს შეუძლიათ მოახდინონ აგენტის პერსონალიზაცია და თავად შეურჩიონ მას სახელი, სასურველი ავატარი ან კომუნიკაციის სტილი. სისტემას აქვს ჩაშენებული კავშირები ისეთ ყოველდღიურ სერვისებთან, როგორიცაა ელექტრონული ფოსტა, კალენდარი, გადახდები, ჯანმრთელობისა და ფიტნესის აპლიკაციები, ჭკვიანი სახლი, რესტორნების ჯავშნები, შოპინგი, მუსიკა და ღონისძიებები. მნიშვნელოვანია, რომ მომხმარებელი თავად ირჩევს და რთავს თითოეულ სერვისს სათითაოდ. იმ შემთხვევაში, თუ კონკრეტულ სერვისს პირდაპირი ინტეგრაცია არ აქვს, Muse ალტერნატივის სახით იყენებს საჯარო API-ს ან თავად ხსნის ბრაუზერს, რათა დავალება მაინც შეუფერხებლად შეასრულოს.
წყარო: Meta debuts its Muse AI agent. Will consumers trust it? | TechCrunch, Meta bets on AI agent Muse to catch up in AI race | The Verge, Introducing Muse: The World's First Personal AI Agent Built for Everyone | Meta, Stripe helps Muse, Meta's new personal AI agent, shop across the internet with Link | Stripe
