მხატვრული, პოსტადამიანური სამყარო, სადაც ბუნებამ ყველაფერი დაიბრუნა, ხოლო მთავარ როლებში ზღარბი და მაქცია-ენოტის მსგავსი პერსონაჟები არიან: Blender Studio-მ ახალი ანიმაციური პროექტის, OVERGROWN-ის თიზერი წარადგინა. პროექტი მხოლოდ მორიგი ვიზუალური ექსპერიმენტი არ არის. ეს არის ღია კინოწარმოების პლატფორმა და მზა მანიფესტი იმისა, თუ როგორ შეიძლება შეიქმნას მსხვილი ანიმაციური ფილმი ტრადიციული ჰოლივუდური ბიუჯეტების გარეშე.
რეჟისორების, ჰიალტი ჰიალმარსონის (Hjalti Hjalmarsson) და რიკ შუტეს (Rik Schutte) ხელმძღვანელობით შექმნილი თიზერი ამჟამად სრულმეტრაჟიანი ფილმის დასაფინანსებლად ძლიერ კონცეფციასა და ტექნიკურ დემოს წარმოადგენს. სტუდიის მიზანია, წარმატებული კამპანიის შემთხვევაში, ინდუსტრიას ღია წყაროებზე დაფუძნებული კინოწარმოების სახელმძღვანელო შესთავაზოს, სადაც ყველა ინსტრუმენტი, სამუშაო პროცესი და გამოცდილება საჯარო იქნება.
ვიზუალური თვალსაზრისით, სტუდიამ ფოტორეალიზმზე უარი თქვა და ხელნაკეთი, მხატვრული ესთეტიკა აირჩია. სტილიზებული მასალები და ე.წ. Painterly Shadows მიდგომა სიმონ ტომეს (Simon Thommes) მასტერკლასის ბაზაზე აიგო, რამაც კადრებს განსაკუთრებული, თბილი და ნახატისებური იერი შესძინა. მნიშვნელოვანია ისიც, რომ პროექტი სრულად არტისტებზეა ორიენტირებული – ის არ ეყრდნობა ღრუბლოვან სერვისებს ან ხელოვნურ ინტელექტს, რაც ტრადიციული ანიმაციის გულშემატკივრებისთვის პრინციპული პოზიციაა.
კამპანიის ფარგლებში, Open Doors Week ინიციატივით, სტუდიამ წარმოების დეტალური ჟურნალები და რესურსები, მათ შორის რიგები, ბეწვის სიმულაციები, გახმოვანება, დეკორაციები, წყლის ეფექტები, განათება და კომპოზიტინგი, დროებით ყველასთვის ხელმისაწვდომი გახადა. Blender-ის უახლოესი ორი წლის განვითარების სტრატეგია პირდაპირ ამ პროექტის საჭიროებებზეა მორგებული და ყურადღებას დინამიკურ გადაფარვებზე, ანიმაციაზე, მონტაჟსა და კოლაბორაციულ აქტივებზე ამახვილებს.
ფინანსური მოდელი საზოგადოების ერთობლივ ძალისხმევას ეფუძნება. სტუდია სექტემბრის ბოლომდე 7 000 ახალი Blender Studio აბონენტის მოზიდვას ცდილობს. ვიზუალური განვითარებისა და ღია ფაიფლაინის დაფინანსების დაახლოებით ოცი პროცენტი საზოგადოებაზე მოდის, ხოლო დანარჩენი ნაწილისთვის გარე პროდიუსერების მოზიდვა იგეგმება. თიზერის პოპულარიზაციისთვის სტუდიამ აბონენტებისთვის ოცპროცენტიანი ფასდაკლებაც დააწესა.
Blender-ის ეს ნაბიჯი შესაძლოა გარდამტეხი აღმოჩნდეს ინდი სტუდიებისთვის, რომლებიც ცდილობენ დამოუკიდებლად დაარღვიონ მსხვილი კინოკომპანიების მონოპოლია.
წყარო: 80 Level
