ნიუ-იორკის ცენტრში, Rockefeller Plaza-ს ტერიტორიას ახალი არქიტექტურული პროექტი შეემატა. West 48th Street-ზე ახლად აშენებული 33-სართულიანი კოშკი გამოჩნდა. ეს არ არის უბრალო რეკონსტრუქცია: შენობა სპეციალურად სასტუმროსთვის აშენდა და მასში ახალი Kimpton Era განთავსდა. ადგილობრივმა არქიტექტურულმა სტუდია INC-მა მასშტაბური პროექტის ინტერიერის დიზაინზე იმუშავა და შენობის 529 ნომერი სრულიად განსხვავებული კონცეფციით მოაწყო. პროექტის მთავარი მიზანი მანჰეტენის მრავალფეროვანი და კონტრასტული ხასიათის ზუსტი ასახვა იყო.
არქიტექტორებმა ინტერიერის შესაქმნელად შთაგონება ნიუ-იორკის ორი განსხვავებული ნაწილიდან და ისტორიიდან აიღეს. აქ ერთდროულად იგრძნობა Uptown-ის კლასიკური ელეგანტურობა და Downtown-ის ინდუსტრიული სიმკაცრე. ამავდროულად, დიზაინერებმა პირდაპირი გავლენა მდინარე Hudson-ზე მცურავი ისტორიული, ძვირადღირებული გემების ესთეტიკიდან მიიღეს. პროექტში გამოყენებული მასალები ამ კონტრასტს ნათლად უსვამს ხაზს. სივრცეში ერთმანეთს ერწყმის ძვირფასი მარმარილო, თითბერი, ნატურალური ტყავი და მოჭიქული კერამიკა. ამ დახვეწილი ელემენტების საპირწონედ და ბალანსის მისაღწევად, ინდუსტრიული ბეტონი და გამომწვარი შავი ფოლადია გამოყენებული.
მონუმენტური ატრიუმი დიზაინში
შენობაში შესვლისთანავე, სტუმრებს სამმაგი სიმაღლის ატრიუმი ხვდებათ. უზარმაზარი სივრცე მთლიანად გოფრირებული ბეტონით არის შეფუთული, რაც მას მონუმენტურ და მკაცრ იერს სძენს. ცენტრალურ ნაწილში შავი ფოლადისა და მინისგან დამზადებული მასიური კიბეა მოწყობილი. ეს კონსტრუქცია ორგანული ფორმების მქონე მობილურს სპირალურად ეხვევა. ლიფტების ლობიში დიზაინერებმა სპეციალურად დამუშავებული ხე გამოიყენეს. ტერაცოს საზღვრები და სივრცეში გაფანტული რბილი განათება მყუდრო ატმოსფეროს ქმნის. მისაღების სივრცეში კი მთავარ აქცენტს შავი მარმარილოს იარუსებისგან შექმნილი დახლი წარმოადგენს.
როგორც INC-ის პარტნიორი, Adam Rolston, განმარტავს, დიზაინის მთავარი იდეა სტუმრის ოთახებისთვის განსაკუთრებული ფორმის მიცემა იყო. მისი თქმით, თითოეული ნომერი „ოკეანის ლაინერზე არსებულ კაიუტას“ ჰგავს. სივრცეები კომპაქტურია და მასალები დიდი ოსტატობით არის დამუშავებული. ოთახებში მთლიანი კედლები თეთრი მუხისგან არის შექმნილი. ხის მყარ პანელებში პირდაპირ არის ინტეგრირებული საწოლი, სამუშაო მაგიდა და სათავსოები, რაც სივრცის ეკონომიის საშუალებას იძლევა. ინტერიერს ძვირფასი ქვების ტონალობის ქსოვილები და თითბერის დეტალები ამდიდრებს. სააბაზანოები სველი წერტილის პრინციპით არის მოწყობილი. იზოლაციისთვის, შავი ლითონის ჩარჩოში ჩასმული გლუვი და დაბურული მინის მოცურავე კარებია დამონტაჟებული.
ხუთი განსხვავებული რესტორანი
სასტუმროში სტუმრებისთვის ხუთი კვების ობიექტია განთავსებული და თითოეულ მათგანს სრულიად ინდივიდუალური დიზაინი აქვს. ლათინოამერიკული რესტორანი პირველი სართულიდან სარდაფამდე ვრცელდება და ტერაკოტის კედლებით გამოირჩევა. მეორე სართულზე კლასიკური ბრასერია მდებარეობს, სადაც რბილი სავარძლები, პანელური კედლები, მოზაიკური იატაკი და თვალისმომჭრელი ალისფერი კერამიკული ბარია მოწყობილი.
მესამე სართულზე ლობის კაფეა განთავსებული. შენობის სახურავზე არსებული ბარი კი ჩაინათაუნის ტრადიციული სასადილოების ესთეტიკას იმეორებს. აქ მთავარი ვიზუალური ელემენტები ტომატისფერი დახლი, კრამიტით მოპირკეთებული პორტალები და ლოტოსის ფორმის მოტივებია.
ეს არქიტექტურული პროექტი INC-სთვის განსაკუთრებულია. წელს დიზაინ-სტუდია დაარსებიდან მეოცე საიუბილეო წელს აღნიშნავს და Kimpton Era მათ პორტფოლიოში ერთ-ერთი მნიშვნელოვანი ნამუშევარია. ობიექტის ინტერიერის ფოტოები სპეციალურად ამ პროექტისთვის ფოტოგრაფმა Read McKendree-მ გადაიღო.
| ნომრები | 529 |
| სართულები | 33 |
| ლოკაცია | West 48th Street |
| კვების ობიექტები | 5 |
ფოტო: Read McKendree / Dezeen
წყარო: Dezeen
