ნორვეგიის მეთევზეობის დედაქალაქად ცნობილ Båtsfjord-ის ნავსადგურში ახალი საზოგადოებრივი სივრცე გამოჩნდა. სტუდენტურმა არქიტექტურულმა სტუდია Rare Collectiv-მა ადგილობრივი თემისთვის 40-მეტრიანი ხის კონსტრუქცია Skroget შექმნა, რომელიც საუნასა და ღია მოსასვენებელ ტერასას აერთიანებს.
ნორვეგიულად Skroget გემის კორპუსს ნიშნავს. პროექტზე NTNU-ის Design in Context კურსის 15 სტუდენტი მუშაობდა, რომლებმაც გემის ჩონჩხით შთაგონებული ნაგებობა თავად დააპროექტეს და ააშენეს.
მეორადი ხე
პროექტის სტრუქტურა თითქმის მთლიანად მეორადი ხის მასალითაა აშენებული. აღნიშნული მასალა ადგილობრივმა მუნიციპალიტეტმა ახლახან დაშლილი ძველი შენობიდან მოიპოვა.
Rare Collectiv-ის გუნდის წევრებმა თავდაპირველად 15 ინდივიდუალური იდეა განიხილეს. მათგან სამი საუკეთესო ვარიანტი შეარჩიეს, საბოლოო დიზაინი კი ხმის მიცემით დაამტკიცეს.
ნაგებობის მთავარი მახასიათებელი ხის 19 პორტალია. ნავსადგურისკენ დახრილი ჩარჩოები სახურავს ქმნის, რომელიც სამხრეთით, ხმელეთის მხარეს არსებულ მოსასვენებელ ადგილებსა და გასასვლელს იცავს. დასავლეთით მდებარე მთავარ შესასვლელსა და აღმოსავლეთით განთავსებულ საუნას შორის დერეფანია, სადაც გასახდელები და საშხაპეებია მოწყობილი.
მკაცრი გარემო და სითბო
მეორადი მასალისგან აგებული ძირითადი სტრუქტურისგან განსხვავებით, Skroget-ის 15-კვადრატულმეტრიანი საუნა ახალი ხის მასალითაა აშენებული. გარედან მას მუქი ყავისფერი ფასადი აქვს, შიდა სივრცეში კი ღია ფერის არყის ხეა გამოყენებული.
როგორც ავტორები აღნიშნავენ, მათი მიზანი საუნის გამოცდილების ცივ წყალთან დაკავშირება იყო, რათა სტუმრებმა მომავალში ზღვაში ბანაობაც შეძლონ. პროექტის მთავარი იდეაც სწორედ უხეშ წყლისპირა ზოლსა და სამხრეთის დაცულ მხარეს შორის არსებული კონტრასტია.
ხის მასიური ჩარჩოები ვიზუალურად თევზის ჩონჩხს ან გემის კორპუსს წააგავს. ეს ორმაგი ასოციაცია იდეალურად ერგება Båtsfjord-ის სანაპიროს ხასიათს და ადგილობრივი მოსახლეობისთვის შეხვედრის ახალ ადგილს ქმნის.
წყარო: Dezeen
