ხელოვნური ინტელექტის მუდმივად აქტიური აგენტების გამოჩენამ კომპიუტერული უსაფრთხოების სტანდარტების გადახედვის აუცილებლობა გააჩინა. macOS ოპერაციულ სისტემაში არსებული “Full Disk Access” არის სპეციალური ნებართვა, რომელიც აპლიკაციას მომხმარებლის მთლიან სისტემაზე წვდომას ანიჭებს. როგორც Apple განმარტავს, ეს ფუნქცია დიდწილად გვერდს უვლის კონფიდენციალურობის სტანდარტულ კონტროლს, რათა სარეზერვო კოპირების აპლიკაციებმა Mac კომპიუტერებზე გამართულად შეძლონ მუშაობა. თუმცა ახალი ტექნოლოგიების ფონზე ეს მიდგომა პოტენციურ საფრთხედ იქცა, რაზეც კომპანიამ 2 ოქტომბერს დეველოპერებისთვის გავრცელებულ ოფიციალურ განცხადებაში ისაუბრა.
უსაფრთხოების ახალი გამოწვევები
Apple-ის განცხადებით, ზოგიერთი დეველოპერი Full Disk Access ფუნქციას ისეთი გზებით იყენებს, რამაც შესაძლოა, მომხმარებლები რისკის ქვეშ დააყენოს. კომპანიის თქმით, ეს სისტემაში არსებულ ყველაფერს, ფაილების, ფოსტის, შეტყობინებებისა და ბრაუზერის ისტორიის ჩათვლით, ხელმისაწვდომს ხდის ისე, რომ მომხმარებლებს ამის შესახებ სრული ინფორმაცია და წარმოდგენა არ აქვთ. კომუნიკაციის აპლიკაციების შემთხვევაში ამან შესაძლოა იმ ადამიანების კონფიდენციალურობაც დაარღვიოს, ვისთანაც მომხმარებლები კონტაქტობენ.
Apple-ის განცხადებაში ნათქვამია, რომ AI აგენტების შესაძლებლობებისა და ავტონომიურობის ზრდასთან ერთად, წვდომის ამ დონესთან დაკავშირებული რისკები არსებითად გაიზრდება. სამომავლოდ Apple დამატებით მექანიზმებს დანერგავს. კომპანიის მიზანია, უზრუნველყოს, რომ მომხმარებლებმა, რომლებსაც ნამდვილად სურთ აპლიკაციისთვის ამ განსაკუთრებული წვდომის მინიჭება, ეს მხოლოდ ძალიან მკაფიო ქმედებით შეძლონ. Apple-ს სურს, რომ სისტემის გახსნამდე ადამიანებს კარგად ესმოდეთ მოსალოდნელი საფრთხეები. ჯერჯერობით კომპანიას არ დაუკონკრეტებია, როდის ამოქმედდება დამატებითი კონტროლის მექანიზმები ან ზუსტად როგორი იქნება მათი ვიზუალური მხარე.
AI აგენტები და პირადი მონაცემები
აღსანიშნავია, რომ Apple-ს თავის განცხადებაში კონკრეტული კომპანიები არ დაუსახელებია. თუმცა ეს სიახლე ემთხვევა ისეთი მუდმივად აქტიური AI აგენტების აღზევებას, როგორებიცაა Meta-ს Muse და OpenAI-ის Dots. რამდენიმე კვირით ადრე გამოცემა Inc-ის ჟურნალისტმა Jason Aten-მა აღმოაჩინა, რომ Meta-ს Muse AI-მ მისი პირადი შეტყობინებების შინაარსი იცოდა. ეს მოხდა იმის მიუხედავად, რომ მას iPhone-სა და Mac-ზე აპლიკაციისთვის ამის ნებართვა პირდაპირ არ გაუცია.
ამ ფაქტთან დაკავშირებით Meta-ს სპიკერმა Andy Stone-მა განმარტა, რომ შეტყობინებებზე წვდომა სრულად მომხმარებლის გადაწყვეტილებაზეა დამოკიდებული. მისი თქმით, ამისთვის აუცილებელია როგორც Full Disk Access-ის, ისე Messages კონექტორის წინასწარ ჩართვა. ეს შემთხვევა ნათლად აჩვენებს, თუ რატომ ცდილობს Apple ოპერაციულ სისტემაში უსაფრთხოების ზომების გამკაცრებას.
წყარო: Apple Developer | MacRumors | The Verge
