Anthropic Claude-ის მუშაობის პრინციპს ცვლის: ცალკე Chat-ისა და Cowork-ის არჩევის ნაცვლად, მომხმარებელს ახლა ერთი სამუშაო სივრცე აქვს, სადაც Claude თავად წყვეტს, რომელი შესაძლებლობა სჭირდება კონკრეტული დავალების შესასრულებლად. ახალ ინტერფეისში გაერთიანებულია ჩატი, Cowork, Artifacts და Claude Design.
ცალკე მიმართულებად დაემატა პრეზენტაციებიც. Claude-ს შეუძლია სლაიდების შექმნა, მათი რედაქტირება და წარდგენისთვის მომზადება. მზა პრეზენტაციის ჩამოტვირთვა შესაძლებელია PDF-ის ან PowerPoint-ის ფორმატში. ერთიან სამუშაო სივრცეში მუშაობს Claude Design-იც, რომელიც Anthropic-მა აპრილში წარადგინა. ინსტრუმენტი იდეიდან ვიზუალური მასალის, პროტოტიპის, პრეზენტაციისა და სხვა დიზაინ-ნამუშევრის შექმნაზეა ორიენტირებული. მომხმარებელს შეუძლია მიღებული შედეგის პირდაპირ შეცვლა ან Claude-სთვის ახალი ინსტრუქციის მიცემა.
Anthropic ამ ცვლილებას მხოლოდ ინტერფეისის გამარტივებად არ განიხილავს. იანვარში გამოშვებული Cowork თავდაპირველად Claude-ის ცალკე აგენტური სამუშაო სივრცე იყო, რომელიც მომხმარებლის ფაილებთან და მრავალსაფეხურიან დავალებებთან მუშაობისთვის შეიქმნა. ივლისში ის ვებსა და მობილურზეც გაფართოვდა. ახლა ეს შესაძლებლობები ერთ Claude-ში იყრის თავს. მაგალითად, მომხმარებელს შეუძლია დაიწყოს კვლევა ჩვეულებრივ ჩატში, შემდეგ სთხოვოს Claude-ს მიღებული ინფორმაციის საფუძველზე დოკუმენტის მომზადება, მისგან პრეზენტაციის შექმნა ან ვიზუალური მასალის დამუშავება ისე, რომ ცალკე სამუშაო რეჟიმის მოძებნა აღარ დასჭირდეს.
მანამდე მომხმარებელს თავად უნდა გადაეწყვიტა, სწრაფი პასუხისთვის Chat გამოეყენებინა თუ მრავალსაფეხურიანი სამუშაოსთვის Cowork-ზე გადასულიყო. Anthropic-ის ახალი მიდგომა ამ არჩევანს აუქმებს. მოთხოვნის მიხედვით, Claude საჭირო ინსტრუმენტებს ავტომატურად იყენებს და მომხმარებელს სხვადასხვა ჩანართსა თუ ფანჯარას შორის გადართვა აღარ სჭირდება.
განახლების ერთ-ერთი მთავარი ნაწილი დოკუმენტებთან მუშაობაა. Claude-ის Docs ფუნქციით მომხმარებელს შეუძლია ტექსტის შექმნა და რედაქტირება, ცალკეული მონაკვეთების დამუშავება, კითხვების დასმა და უკვე მომზადებულ ნაწილებზე კომენტარების გაკეთება. დასრულებული დოკუმენტის სხვებთან გაზიარებაც შესაძლებელია ბმულით.
წყარო: Anthropic / Claude blog – Cowork is now Claude, TechCrunch – Anthropic merges Claude chat and Cowo, Claude Help Center – unified interface
