YouTube-ზე 4 ოქტომბერს გავრცელებული ვიდეო, სახელწოდებით „ჩვენ რობოტულ ხელს კარტის ფოკუსები ვასწავლეთ. არ დაახამხამოთ“, ერთი შეხედვით, ჩვეულებრივი ილუზიონისტის პერფორმანსს ჰგავს. თუმცა კადრში ადამიანის ნაცვლად ლითონის მექანიკური ხელი ჩანს. იგი სწრაფი და ზუსტი მოძრაობებით თხელი კარტითა და პატარა მონეტით ფოკუსებს აკეთებს. ერთ ეპიზოდში მოწყობილობა ბანქოს ფურცელს წამებში ცვლის, მეორეში კარტიდან სათამაშო მანქანა ამოაქვს, ბოლოს კი მონეტას ოსტატურად აქრობს. ჩინურმა რობოტულმა სტარტაპმა LinkerBot-მა ახალი თაობის მოწყობილობა LinkerHand O30 სწორედ ამ ფორმით წარადგინა.
ვიდეოს მთავარი მიზანი მექანიზმის ფიზიკური შესაძლებლობების დემონსტრირება იყო. მომავლის ჰუმანოიდმა რობოტებმა ადამიანის მსგავსი რთული მანიპულაციები უნდა შეასრულონ, რისთვისაც წვრილი მოტორიკის მაღალი დონეა საჭირო. ლითონის ხელი თხელ ბარათებსა და მცირე ზომის მონეტებს თითების კოორდინირებული, სწრაფი და დამოუკიდებლად კონტროლირებადი მოძრაობებით მართავს. აღსანიშნავია, რომ ეს დადგმული პერფორმანსია და ხაზს უსვამს მექანიკურ მოქნილობასა და არა ავტონომიური ხელოვნური ინტელექტის გადაწყვეტილებებს. მექანიზმს ფოკუსები დამოუკიდებლად არ უსწავლია.
20 დამოუკიდებელი სახსარი
მოდელი LinkerHand O30 სპეციალურად ჰუმანოიდური და სტანდარტული ინდუსტრიული რობოტებისთვის შექმნილი მანიპულატორია, რომელიც რობოტის საბოლოო შემსრულებელი ელემენტის როლს ასრულებს. Interesting Engineering-ის მიერ გავრცელებული მონაცემებით, მას თავისუფლების 20 აქტიური ხარისხი აქვს. ეს ნიშნავს, რომ მოწყობილობა 20 დამოუკიდებლად კონტროლირებადი აქტიური სახსრით ფუნქციონირებს და პირდაპირი ამძრავის არქიტექტურას ეფუძნება.
ტექნიკური მახასიათებლები სპეციფიკურია. ხელი აღჭურვილია უჯაგრისო ძრავებითა და ზუსტი ტრანსმისიით, რომელიც პოზიციისა და ბრუნვის მომენტის დახურული კონტურის კონტროლით მუშაობს. მიუხედავად იმისა, რომ მოდელის წონა მხოლოდ 730 გრამია, მისი მაქსიმალური ტვირთამწეობა 30 კილოგრამს აღწევს.
თითების ძალა სხვადასხვა ტიპის დატვირთვისთვის არის გათვლილი. ცერის წნევის ძალა 24 ნიუტონს შეადგენს. ოთხი თითის გვერდითი ჩაჭიდების მაჩვენებელი 30 ნიუტონია, ხოლო ხუთივე თითის ერთდროული ჩაჭიდების მაქსიმალური ძალა 70 ნიუტონს აღწევს. მოწყობილობის მაქსიმალური ენერგომოხმარება 150 ვატია, ხოლო სტატიკური დენი 24 ვოლტზე 0.4 ამპერამდე ჩამოდის. მისი დიზაინი ისეა გათვლილი, რომ რობოტულ სისტემებში ინტეგრაცია და დამონტაჟება სწრაფად განხორციელდეს.
ინდუსტრიული და სამეცნიერო გამოყენება
2023 წელს დაფუძნებული LinkerBot-ი ამ მოწყობილობას განიხილავს, როგორც ფართო კვლევით პლატფორმას. იგი განკუთვნილია მოწინავე რობოტექნიკისა და რთული მანიპულაციური ხელოვნური ინტელექტის მოდელების სავარჯიშოდ. სისტემა ასევე გამოსადეგია ტელეოპერირების პროცესებისთვის, სადაც დისტანციური მართვა მაღალ სიზუსტეს მოითხოვს.
გარდა კვლევითი მიმართულებისა, მექანიზმს პრაქტიკული სამრეწველო დანიშნულებაც აქვს. იგი გამოსადეგია რთული და მაღალი სიზუსტის საწარმოო პროცესებისთვის. ხელის გამოყენება შესაძლებელია ელექტრონიკის, საავტომობილო და აეროკოსმოსურ ინდუსტრიებში. ზუსტი კონტროლი მას საშუალებას აძლევს, უსაფრთხოდ იმუშაოს მყიფე ობიექტებთან და მიკროდეტალების ზუსტი აწყობის პროცესში ჩაერთოს.
ჯერჯერობით არცერთ ოფიციალურ წყაროში არ სახელდება მოწყობილობის ზუსტი ფასი და ბაზარზე გამოსვლის თარიღი. გავრცელებული ტექნიკური მახასიათებლები მხოლოდ კომპანიის განცხადებას ეფუძნება და ისინი დამოუკიდებელი ლაბორატორიების მიერ ჯერ არ შემოწმებულა.
| თავისუფლების ხარისხი | 20 აქტიური სახსარი |
| ძრავები | უჯაგრისო |
| წონა | 730 გრამი |
| მაქსიმალური დატვირთვა | 30 კგ |
| ცერის ძალა | 24 N |
| ხუთი თითის ძალა | 70 N |
| ენერგომოხმარება | 150 W-მდე |
წყარო: Interesting Engineering | LinkerBot
