ქლაუდ გეიმინგი ბრაუზერისთვის ერთ-ერთი ყველაზე მძიმე გამოცდაა: ვიდეოს მინიმალური დაყოვნებით გატარება, აუდიოს სინქრონიზაცია და კონტროლერის რეაქცია წამებში სისტემისგან მაქსიმალურ რესურსს ითხოვს. სწორედ ამიტომ, წლების განმავლობაში Firefox-ის მომხმარებლები პარადოქსულ რეალობაში ცხოვრობდნენ. ყოველდღიური სერფინგისთვის სწრაფ, დამოუკიდებელ ბრაუზერს ირჩევდნენ, მაგრამ როგორც კი საღამოს საყვარელი თამაშის გაშვება მოუნდებოდათ, იძულებულნი იყვნენ, პარალელურად Chrome ან Edge გაეხსნათ. ახლა ეს კომპრომისი ოფიციალურად დასრულდა.
NVIDIA-მ და Mozilla-მ რამდენიმეთვიანი ერთობლივი ინჟინერიის შემდეგ დაადასტურეს, რომ GeForce NOW უკვე ოფიციალურად მუშაობს Firefox-ში. ეს ნიშნავს, რომ პირდაპირ ბრაუზერიდან 2,000-ზე მეტი კომპიუტერული თამაშის სტრიმინგია შესაძლებელი, ყოველგვარი ჩამოტვირთვის, მძიმე ინსტალაციისა და ძვირადღირებული ვიდეობარათების გარეშე. პლატფორმა უერთდება თქვენს არსებულ ბიბლიოთეკებს, მათ შორის Steam, Epic Games Store, GOG, Xbox PC Game Pass, Ubisoft Connect და EA ანგარიშებს. ვიტრინაზე უკვე ჩანს ისეთი მასშტაბური პროექტები, როგორებიცაა Crimson Desert, PRAGMATA და First Light. მართალია, The Verge-ის ცნობაში 5,000-ზე მეტი თამაში დასახელდა, თუმცა Mozilla-სა და NVIDIA-ს ოფიციალური დოკუმენტაცია 2,000-ზე მეტ სათაურზე საუბრობს და რეალურ სასტარტო რიცხვად სწორედ ეს უნდა მივიჩნიოთ.
საკითხი მხოლოდ ახალ პლატფორმაზე წვდომა არ არის. როგორც NVIDIA GeForce NOW-ს დირექტორმა, ენდრიუ ფირი (Andrew Fear) აღნიშნა: „Firefox-მა ჩვენს მხარდაჭერილ ბრაუზერთა სიაში ადგილი იმ პირველი კლასის გამოცდილების უზრუნველყოფით დაიმსახურა, რასაც GeForce NOW-ს მოთამაშეები ელიან. ჩვენ ბრაუზერების მხარდაჭერას საკმაოდ მაღალ თამასას ვუწესებთ და გვიხარია Firefox-ის მიღება – ეს Firefox-ის მილიონობით გულშემატკივარს საყვარელი თამაშების სტრიმინგის ახალ გზას აძლევს“. თავის მხრივ, Firefox-ის ხელმძღვანელმა აჯიტ ვარმამ (Ajit Varma) ხაზი გაუსვა, რომ ეს მნიშვნელოვანი ეტაპია ქლაუდ გეიმინგისთვის იმ ბრაუზერზე, რომლის ქვაკუთხედიც მომხმარებლის კონფიდენციალურობა, პროცესების კონტროლი და მოქნილობაა.
ტექნიკური დეტალები კი მკაფიო ზღვარს ავლებს. პირველ რიგში, ოფიციალური მხარდაჭერა ამ ეტაპზე მხოლოდ Windows ოპერაციულ სისტემაზე ვრცელდება და მოითხოვს მინიმუმ Firefox 153.0.1 ვერსიას. macOS-ის ან Linux-ის მომხმარებლებს ჯერ კიდევ მოუწევთ ლოდინი. მეორე მნიშვნელოვანი დეტალი გამოსახულების ხარისხია. ბრაუზერში თამაშის გაშვება უფასო Basic ტარიფითაც შეგიძლიათ, თუმცა იქ სტანდარტული 1080p ლიმიტი, მოკლე საათობრივი სესიები და რეკლამები დაგხვდებათ. თუ თქვენი მიზანი მაქსიმალური ვიზუალია, ანუ 1440p (QHD) რეზოლუცია და 120 FPS სიხშირე, აუცილებლად დაგჭირდებათ ფასიანი Ultimate პაკეტი და სტაბილური, მინიმუმ 35 Mbps სიჩქარის ინტერნეტი. მათთვის, ვისაც სისტემის გამოცდა სურს, ხელმისაწვდომია ერთდღიანი საშვიც (day pass), რომლის ღირებულებაც შემდგომში Performance ან Ultimate გამოწერის ბალანსზე შეიძლება ჩაითვალოს.
გეიმერული ყოველდღიურობისთვის ყველაზე მოსახერხებელი ფუნქცია მაინც Split View აღმოჩნდა. ბრაუზერის ეკრანის გაყოფით შეგიძლიათ ერთ მხარეს სტრიმინგით ითამაშოთ, მეორე მხარეს კი გახსნილი გქონდეთ Discord, Reddit-ის დისკუსია ან რთული მისიის გზამკვლევი. როცა დამატებითი ინფორმაცია აღარ დაგჭირდებათ, ერთი დაწკაპებით გადახვალთ სრულ ეკრანზე.
პროცესი მარტივია: განაახლეთ Firefox უახლეს ვერსიამდე, გადადით მისამართზე play.geforcenow.com, გაიარეთ ავტორიზაცია თქვენი GeForce NOW ანგარიშით და თამაში მზადაა. პარტნიორობის გაფართოების შესახებ დამატებით დეტალებს კომპანიები 25 აგვისტოს, Gamescom-ის გამოფენაზეც განიხილავენ.
წყარო: Mozilla Blog, NVIDIA Blog, Firefox (Facebook), Engadget, The Verge
