ხელოვნური ინტელექტი მხოლოდ სმარტფონის ეკრანზე აღარ რჩება და ფიზიკურ სამყაროში ინაცვლებს. პირადმა AI ასისტენტმა, სახელად Muse, რომელიც მომხმარებლის ნაცვლად მოგზაურობას გეგმავს, რთულ ფორმებს ავსებს და ონლაინ-შესყიდვებსაც კი დამოუკიდებლად აკეთებს, სრულიად ახალი შესაძლებლობები მიიღო.
2 ოქტომბერს Meta-მ ღია კოდზე დაფუძნებული პროექტი, Muse Gadgets, წარადგინა. ეს ინიციატივა ენთუზიასტებს აძლევს საშუალებას, საკუთარი ხელით ააწყონ მოწყობილობები, რომლებიც კომპანიის ასისტენტს პირდაპირ დაუკავშირდება.
პროექტის ფარგლებში, პროგრამისტებს შეუძლიათ, გამოიყენონ სტანდარტული ESP32 დაფა ან Raspberry Pi სისტემა. Meta მათ შესაბამის პროგრამულ უზრუნველყოფასა და Linux SDK-ს სთავაზობს. კომპანიის განცხადებით, მომხმარებლებს შეუძლიათ, ასისტენტი დაუკავშირონ ეკრანებს, ღილაკებს, სენსორებსა და ნებისმიერ სხვა დეტალს, რაც მათ სამუშაო მაგიდაზე მოეპოვებათ. საჭირო ინსტრუქციები და კოდი GitHub-ის პლატფორმაზეა ატვირთული, ხოლო დახმარების მიღება და კითხვების დასმა სპეციალურ Discord არხზეა შესაძლებელი. იდეების სახით, კომპანია E Ink ფერად ეკრანს, ტელევიზორისთვის განკუთვნილ HDMI მოდულსა და მცირე ზომის სენსორულ მოწყობილობას ასახელებს. დეველოპერები ენთუზიასტებს აფრთხილებენ, რომ ექსპერიმენტებისას ყველა რისკზე პასუხისმგებლობას თავად იღებენ.
ოფიციალური მოდული ჭკვიანი სახლისთვის
ღია პროექტთან ერთად, გამოვიდა სპეციალური ფიზიკური მოდული Muse Home Link. ეს არის ESP32-C5 ჩიპზე აგებული 35 x 42 x 10 მილიმეტრის ზომის პატარა USB-C მოწყობილობა, რომელიც ასისტენტს სახლის Wi-Fi ქსელთან და უკვე არსებულ ჭკვიან ტექნიკასთან აკავშირებს. მოწყობილობის საწყისი კონფიგურაცია Muse-ის აპლიკაციაში, Bluetooth LE ტექნოლოგიით ხდება და მასზე სტატუსის მაჩვენებელი LED ინდიკატორიც არის დატანილი. მოდულს, ასევე, აქვს USB-A პორტის მხარდაჭერა.
საზოგადოების მიერ შექმნილ დამატებებს შეუძლია, Muse-ს ასწავლოს შუქის ჩართვა, ტელევიზორის მართვა, პრინტერზე დოკუმენტის გაგზავნა და სხვა ფუნქციების შესრულება მომხმარებლის მოწყობილობების მიხედვით. ამ ფუნქციების დაყენება მომხმარებლებს GitHub-დან შეუძლიათ. მიუხედავად ამ მრავალფეროვნებისა, Meta მკაცრად აფრთხილებს მომხმარებლებს, რომ მოხალისეების მიერ დაწერილი კოდი შეიძლება, ნებისმიერ დროს გამოვიდეს მწყობრიდან. შესაბამისად, სისტემის გამოყენება უსაფრთხოების, სამედიცინო ან კრიტიკული მიზნებისთვის დაუშვებელია. საინტერესოა ისიც, რომ, მიუხედავად ღია სტანდარტისა, თავად Home Link მხოლოდ ოფიციალურ სისტემაზე მუშაობს და მისი გადაპროგრამება შეუძლებელია.
შეზღუდული რაოდენობა და ბიზნესგადაწყვეტილებები
Meta Superintelligence Labs-ის პროდუქტების ხელმძღვანელის, Nat Friedman-ის, განცხადებით, კომპანიამ Home Link-ის მხოლოდ 5000 ეგზემპლარი დაამზადა. მოწყობილობა ოქტომბერში გამოვა და ის Muse-ის სერვისის აქტიური გამომწერებისთვის სრულიად უფასოა. განაცხადის გაკეთება მოთხოვნის რიგში ჩადგომას ნიშნავს და თითო მომხმარებელს მხოლოდ ერთი მოდულის მიღება შეუძლია. ამ ეტაპზე, შეთავაზება მხოლოდ ამერიკის შეერთებულ შტატებში მოქმედებს.
ტექნიკის მიმართულებით გადადგმული ეს ნაბიჯი ასისტენტის აქტიური განვითარების ეტაპს ემთხვევა. ამავე კვირაში, Meta-მ მცირე ბიზნესისთვის განკუთვნილი Muse for Small Business ჩაუშვა. ეს ვერსია უფასოა, თუმცა გამოყენების გარკვეული ლიმიტები აქვს და პირდაპირ უკავშირდება ისეთ პლატფორმებს, როგორიცაა: Shopify, Dropbox და Slack. პარალელურად, გამოვიდა Meta Enterprise Platform.
| პროცესორი | ESP32-C5 (240 MHz) |
| ოპერატიული მეხსიერება | 8 MB PSRAM |
| შიდა მეხსიერება | 8 MB flash |
| უსადენო კავშირი | Wi-Fi 6 (2.4 და 5 GHz) |
| ზომა | 35 x 42 x 10 მმ |
| რაოდენობა | 5000 ეგზემპლარი |
| ფასი | უფასო Muse-ის გამომწერებისთვის (მხოლოდ აშშ) |
ფოტო: Meta
წყარო: Muse Gadgets (Meta) | The Verge | TechCrunch
