სმენის დამხმარე მოწყობილობის ტარება ბევრისთვის დისკომფორტთან არის დაკავშირებული, რის გამოც მილიონობით ადამიანი მსგავს პროდუქტებზე საერთოდ უარს ამბობს. თუმცა ახლა ტექნოლოგია, შესაძლოა, ჩვეულებრივ სათვალეს ჰგავდეს. Legato სწორედ ამ იდეაზე აშენებს თავის პროდუქტს. Frames არის ხელოვნურ ინტელექტზე დაფუძნებული სათვალე, რომლის ჩარჩოს ტოტებშიც სმენის ტექნოლოგიაა მოთავსებული.
Legato Frames ზრდასრულებისთვის არის განკუთვნილი, რომლებსაც სმენის მსუბუქი ან საშუალო ხარისხის დაქვეითება აქვთ. მისი მთავარი განსხვავება ტრადიციული აპარატებისგან, პირველ რიგში, ფორმაშია. მომხმარებელს ყურში ცალკე მოწყობილობის მოთავსება არ სჭირდება, რადგან სათვალე open-ear დიზაინს იყენებს და სასმენ არხს სრულიად თავისუფალს ტოვებს.
ფარული ტექნოლოგია ჩარჩოში
სათვალეში მუშაობს SpeechSense AI. აღნიშნული სისტემა გარემოში ადამიანების საუბარს ფონური ხმაურისგან გამოარჩევს და ხმას რეალურ დროში ამუშავებს. პროცესი უშუალოდ მოწყობილობაზე მიმდინარეობს, კამერების გარეშე. კომპანიის განცხადებით, სათვალე საუბარს არ იწერს.
ორმაგი დინამიკის სისტემა ხმას პირდაპირ მომხმარებლისკენ მიმართავს. კომპანია ირწმუნება, რომ ყურიდან რამდენიმე ინჩის დაშორებით გარეთ გაჟონილი ხმა დაახლოებით 99 პროცენტით მცირდება. Frames მუსიკის მოსასმენად და ზარების მისაღებად მხარს უჭერს Bluetooth დაკავშირებასაც, როგორც iPhone-ზე, ისე Android-ზე.
მომხმარებლებისთვის ხელმისაწვდომია სამი დიზაინი: Aria, Symphony და Harmony. Aria მოდელი აცეტატისა და მეტალის მასალებს აერთიანებს. სათვალეში შესაძლებელია რეცეპტით გამოწერილი ლინზების ჩასმაც, მისი წონა კი ლინზებთან ერთად 34 გრამს შეადგენს. ერთი სრული დამუხტვით ბატარეა 10-დან 12 საათამდე ძლებს.
Bose-ისა და Meta-ს გამოცდილება
Legato 2024 წელს Mehul Trivedi-მ და Steve Romine-მა დააფუძნეს. Trivedi მანამდე Bose Frames-ის შექმნას ხელმძღვანელობდა, შემდეგ კი EssilorLuxottica-ში მუშაობდა და Meta Ray-Ban პროექტშიც იღებდა მონაწილეობას. Romine, თავის მხრივ, Bose-ის სმენის აპარატების მიმართულებას ედგა სათავეში და მოგვიანებით Audicus-ის ოპერაციული დირექტორი იყო.
Trivedi აღნიშნავს, რომ მილიონობით ადამიანი უარს ამბობს სმენის აპარატებზე, რადგან მათ ჯერ ვერ იპოვეს ისეთი პროდუქტი, რომლის ტარებაც თავად მოუნდებოდათ. სტარტაპი ფარული რეჟიმიდან 2026 წლის აგვისტოში გამოვიდა და Neotribe Ventures-ის, Listen-ისა და Village Global-ისგან 12 მილიონი დოლარი მოიზიდა. ახლა კი მისი პირველი პროდუქტი უკვე გაყიდვაშია.
სათვალეების შეძენა ონლაინ უკვე შესაძლებელია. Symphony და Harmony მოდელების საწყისი ფასი 999 დოლარია, ხოლო Aria ვერსია 1,099 დოლარი ღირს. მყიდველებს 45-დღიანი საცდელი პერიოდი, 3 წლამდე გარანტია და სპეციალისტებისგან უფასო, უვადო მხარდაჭერა აქვთ.
| საწყისი ფასი | $999, Aria $1,099 |
| წონა | 34 გრამი ლინზებით |
| ბატარეა | 10-12 საათი |
| დიზაინი | 3 (Aria, Symphony, Harmony) |
| საცდელი პერიოდი | 45 დღე |
| გარანტია | 3 წლამდე |
ფოტო: Legato
წყარო: TechCrunch | Legato
