Adobe-ის პროფესიონალური კრეატიული ინსტრუმენტები ახლა Google Gemini-შიც მუშაობს, ხოლო Claude-ში Adobe-ის შესაძლებლობები მნიშვნელოვნად გაფართოვდა. Gemini-ში საუბრის რეჟიმიდან უკვე შესაძლებელია Photoshop-ის, Lightroom-ის, Express-ისა და Firefly-ის ინსტრუმენტების გამოყენება, Claude-ში კი Adobe-ის ერთიან პლაგინს Acrobat-ის ფუნქციები და PDF-ებისა და Express-ის დიზაინების ინტერაქტიული რედაქტირების შესაძლებლობა დაემატა.
ეს ნიშნავს, რომ მომხმარებელს აღარ სჭირდება თითოეული ამოცანისთვის ცალკე აპში გადასვლა. ბუნებრივი ენის გამოყენებით შესაძლებელია ფოტოს გაუმჯობესება, დიზაინის მომზადება, PDF-ის რედაქტირება ან უკვე შექმნილ მასალაში კონკრეტული ელემენტების შეცვლა. Adobe-ის ინსტრუმენტები საუბრის კონტექსტის მიხედვით საჭირო ნაბიჯებსა და ხელსაწყოებს თავად აერთიანებს.
Gemini-ში Adobe-ის ინსტრუმენტები საუბრის რეჟიმში მუშაობს
Google Gemini-ში Adobe-ის შესაძლებლობები გლობალურად ეტაპობრივად დღესიდან ვრცელდება და Gemini-ის ყველა გეგმაში იქნება ხელმისაწვდომი. მომხმარებელს შეუძლია საუბრისას Photoshop-ის, Lightroom-ის, Express-ისა და Firefly-ის ინსტრუმენტების გამოყენება, მაგალითად, ფოტოს გაუმჯობესება, მარკეტინგული მასალის შექმნა ან არსებული დიზაინის მორგება.
Demo video (Adobe TV): video.tv.adobe.com/v/3503793
პრაქტიკული გამოყენების ერთ-ერთი სცენარია პროდუქტის ფოტოების მომზადება ონლაინ მაღაზიისთვის. მომხმარებელს შეუძლია ერთიანი ვიზუალური სტილის შესანარჩუნებლად განათების, ფერების ან კადრის ცვლილება. ასევე შესაძლებელია ერთი დიზაინისგან სოციალური ქსელებისთვის სხვადასხვა ფორმატის ვერსიების შექმნა ისე, რომ ბრენდის ვიზუალური იდენტობა შენარჩუნდეს.
Express-ის შაბლონების შემთხვევაში მომხმარებელს შეუძლია მასალა კონკრეტულ კამპანიას, აუდიტორიას ან სასურველ სტილს მოარგოს. ამ პროცესში Adobe-ის ინსტრუმენტები Gemini-ში დაწერილი მოთხოვნის მიხედვით საჭირო მოქმედებებს აერთიანებს.
Google-თან ეს თანამშრომლობის პირველი ნაბიჯია და Adobe-ის თქმით, მომავალში კიდევ უფრო მეტი ინსტრუმენტის დამატებაა დაგეგმილი.
Google: იდეის შექმნა და რეალობად ქცევა ერთ საუბარში
Neal Pancholi, Google-ის Global Partnerships, GDM & Gemini-ის მმართველი დირექტორი, Adobe-სა და Google-ს შორის პარტნიორობის გაფართოებაზე ამბობს, რომ კომპანიას შესაძლებლობების გაფართოება და მომხმარებლებისთვის იდეების შექმნა, რედაქტირება და რეალობად ქცევა პირდაპირ ჩატში სურს.
Gemini-ში Adobe-ის დასაკავშირებლად მომხმარებელმა უნდა გახსნას Personal Intelligence, შემდეგ Connected apps-ში აირჩიოს Adobe და დააკავშიროს Adobe-ის ანგარიში. მათ, ვისაც ანგარიში არ აქვს, მისი უფასოდ შექმნაც შეუძლიათ.
Claude-ში Adobe უკვე მხოლოდ კრეატიული ინსტრუმენტები აღარ არის
Claude-ში Adobe-ის არსებული შესაძლებლობები კიდევ უფრო ფართოვდება. Acrobat-ის ინსტრუმენტები პირველად ერთიანდება Adobe-ის კრეატიულ ხელსაწყოებთან, რის შედეგადაც ერთ პლაგინში 80-ზე მეტი პროფესიონალური ინსტრუმენტია ხელმისაწვდომი. მათ შორისაა Acrobat, Express, Photoshop, Illustrator, Premiere, Lightroom, InDesign, Adobe Stock და სხვა სერვისები.
მომხმარებელს შეუძლია ყველა ეს შესაძლებლობა იმავე Claude-ის საუბარში გამოიყენოს. ამასთან, მუშაობის ორი რეჟიმია შესაძლებელი: მომხმარებელს შეუძლია უბრალოდ აღწეროს სასურველი შედეგი და Claude-მა საჭირო მოქმედებები შეასრულოს, ან თავად გადავიდეს კონტენტში და კონკრეტული ცვლილებები ხელით გააკეთოს.
Acrobat-ის მიმართულებით შესაძლებელია PDF-ის გვერდების წაშლა, გაერთიანება და დაყოფა, ინფორმაციის რედაქტირება ან დაფარვა, ასევე დოკუმენტის სხვა ფორმატში გადაყვანა და ექსპორტი.
ახალი ინტერაქტიული PDF-რედაქტორი მომხმარებელს საშუალებას აძლევს, შეცვალოს გვერდების განლაგება, დაარედაქტიროს ტექსტი და დაამატოს კომენტარები ან მონიშვნები. Document Review-ის შესაძლებლობა კი Claude-ს საშუალებას აძლევს, დოკუმენტი გააანალიზოს, შემდეგ კი რეკომენდაციები და შენიშვნები პირდაპირ რედაქტორში დაამატოს.
Express-ის მიმართულებით დაემატა ფენებზე დაფუძნებული ინტერაქტიული რედაქტორი. მომხმარებელს შეუძლია ცალკე აირჩიოს და შეცვალოს სურათები, ტექსტი, ფერები და შრიფტები ისე, რომ მთლიანი დიზაინის თავიდან შექმნა აღარ დასჭირდეს.
ხელმისაწვდომობა უკვე გლობალურად იწყება
Claude-ის ახალი Adobe-ის პლაგინი გლობალურად დღესიდან ვრცელდება Claude-სა და Claude Code-ში, როგორც დესკტოპზე, ისე მობილურსა და ვებზე. გამოყენება შესაძლებელია სტუმრის რეჟიმით ან Adobe-ის ანგარიშით შესვლით. სრული პლაგინი უფრო მაღალ ლიმიტებს, მეტ ინსტრუმენტსა და სესიის უწყვეტობას იძლევა. Adobe-ის წინა connector-ის მომხმარებლებისთვის ახალი პლაგინი ავტომატურად განახლდება.
Adobe-ის ინსტრუმენტები უკვე ხელმისაწვდომი იყო ChatGPT-ში, Claude-ში, Slack-სა და Copilot-ში. Gemini-ის დამატებით Adobe-ის კრეატიული ხელსაწყოები კიდევ ერთ დიდ AI ჩატბოტის პლატფორმაში გადავიდა, Claude-ში კი ამავე დროს PDF-ებსა და დიზაინებზე მუშაობა უფრო უშუალო და ინტერაქტიული გახდა.
წყარო: Adobe blog
