Microsoft Copilot სამუშაო პროცესების უფრო ფართო პლატფორმად გარდაქმნის: აპს სამი ახალი შესაძლებლობა, Home, Code და Autopilot, ემატება. ამასთან, Microsoft AI-ზე დახარჯული თანხების მართვისთვის Microsoft FinOps-ის ინსტრუმენტებსაც ავითარებს. ახალი ფუნქციები ეტაპობრივად ჩაეშვება და მათი ნაწილი ჯერ მხოლოდ წინასწარი ტესტირების რეჟიმში იქნება ხელმისაწვდომი.
Home
Home Copilot-ის ახალი საწყისი სივრცეა, სადაც Chat და Cowork ერთ ადგილას იყრის თავს. მომხმარებელს შეუძლია, ბოლო აქტივობებს დაუბრუნდეს, მიიღოს შემოთავაზებები და გააგრძელოს დაწყებული სამუშაო.
Chat სწრაფი საუბრისთვისაა განკუთვნილი: კითხვებზე პასუხების მისაღებად, ინფორმაციის მოსაძიებლად და ტექსტების მოსამზადებლად. Cowork კი უფრო რთულ, ბოლომდე მისაყვან ამოცანებს იღებს, მაგალითად, RFP-ზე პასუხის მომზადებას, პროდუქტის გაშვების პაკეტის შექმნას, მომხმარებლისთვის ბრიფინგის მომზადებას ან ფინანსური დახურვის პაკეტის შედგენას.
Microsoft მომავალში ამ პროცესის ავტომატიზაციასაც გეგმავს, რათა Copilot-მა მოთხოვნის მიხედვით თავად განსაზღვროს, საჭიროა Chat, Cowork თუ Code.
Home-ში Microsoft 365-ის შესაძლებლობებიც ფართოვდება. Word, Excel და PowerPoint პირდაპირ Copilot-ში მუშაობს, მათ შორის, რედაქტირებადი დოკუმენტები, სამუშაო წიგნები და პრეზენტაციები. ცვლილებები Office-ის აპებთან სინქრონიზდება, ხოლო გუნდურ მუშაობაში შესაძლებელია კოლეგების მოხსენიებაც.
PowerPoint-ში შესაძლებელია ბრენდის სტილზე მორგებული პრეზენტაციების მომზადება და სლაიდების, სურათებისა და შაბლონების დაზუსტება. Excel ცვლილებებისა და მათი მიზეზების ჩვენებას, ასევე დიაგრამების რეკომენდაციებს ამატებს.
Microsoft 365 Skills კი სპეციალიზებულ ცოდნასა და სამუშაო პროცესებს აერთიანებს. მაგალითად, ფინანსური მიმართულების ცოდნა Excel-ში ან იურიდიული სამუშაო პროცესები Word-ში შეიძლება განმეორებით გამოყენებად ფორმად იქცეს.
Home-ისა და Code-ის გავრცელება უახლოეს კვირებში, Frontier პროგრამის ფარგლებში, დაიწყება.
Code
Code Microsoft Copilot-ს პროგრამირების მიღმაც მიჰყავს. იდეა იმაში მდგომარეობს, რომ მომხმარებელმა ბუნებრივი ენით აღწეროს, რა სჭირდება, ხოლო Copilot-მა შექმნას კონკრეტული დანიშნულების გადაწყვეტა.
ეს შეიძლება იყოს აპი, ტრეკერი, საინფორმაციო პანელი, ავტომატიზაცია ან სამუშაო პროცესი. შედეგად მიიღება დესკტოპის ვიჯეტები, ინტერაქტიული დაფები და კომპანიის Microsoft-ის გარემოში განთავსებული შიდა აპები.
Code-ის საფუძვლად იგივე ტექნოლოგია გამოიყენება, რასაც GitHub Copilot-ში, თუმცა შექმნილი გადაწყვეტილებები იზოლირებულ გარემოში მუშაობს და კომპანიის tenant-ში განთავსდება. Microsoft IQ-ს საშუალებით ისინი შესაბამის ბიზნესკონტექსტსაც ეყრდნობიან, ხოლო Plugin-ები ავტომატურად სინქრონიზდება.
დეველოპერებისთვის GitHub Copilot კვლავ რჩება მთავარ ინსტრუმენტად, თუმცა ახალი შესაძლებლობები მას Copilot-ის პლატფორმასთან უფრო ფართოდ აკავშირებს.
Code-ის შესაძლებლობები Frontier-ში თვის ბოლოს გაფართოვდება, ფართო ხელმისაწვდომობა კი უახლოეს კვირებშია დაგეგმილი. Microsoft 365 Premium-ისა და Pro-ს მომხმარებლებისთვის მისი preview წლის ბოლოს იგეგმება.
Microsoft Copilot Managed Runtime
Code-ის პარალელურად Microsoft Copilot Managed Runtime-ს ავითარებს. ეს არის გარემო, სადაც შექმნილი კოდი კომპანიის Microsoft 365-ის ინფრასტრუქტურაში უსაფრთხოების, IT-ის მართვისა და წვდომის კონტროლის პირობებში მუშაობს.
ორგანიზაციებს შეეძლებათ ასეთი აპების გაზიარება, მათში ცოცხალი მონაცემების გამოყენება და სხვადასხვა ადგილიდან წვდომა. Managed Runtime Cowork-ის, Code-ისა და Copilot Studio-ს მიერ შექმნილი აპებისთვის საფუძვლად გამოიყენება და მომავალში მესამე მხარის ინსტრუმენტებისა და პროფესიონალი დეველოპერებისთვისაც გაიხსნება.
Managed Runtime-ის preview უკვე ხელმისაწვდომია.
Autopilot
Autopilot, რომელსაც ადრე Scout ერქვა, მუდმივად მოქმედ პერსონალურ აგენტად არის წარმოდგენილი. მისი მთავარი განსხვავება ისაა, რომ კონკრეტული დავალებების შესრულებას მომხმარებლის აქტიური ჩართულობის გარეშეც აგრძელებს.
მომხმარებელი Autopilot-ს სახელს, როლსა და მიზანს განუსაზღვრავს. შემდეგ აგენტი აკვირდება შესაბამის არხებს, მიჰყვება საუბრებს, იმახსოვრებს განმეორებით სამუშაოებს და პროექტს რამდენიმე დღის შემდეგაც აგრძელებს.
მაგალითად, მომწოდებლის სრულ მიმოხილვაში მას შეუძლია შეხვედრების დაგეგმვა, სამუშაო გეგმის შედგენა, მოსამზადებელი მასალების შექმნა, შეხვედრების ორგანიზება, შემდგომი მოქმედებების შესრულება და საჭირო ადამიანებთან დაკავშირება.
Autopilot ღრუბელში მუშაობს, ამიტომ დავალებების შესრულება მაშინაც შეუძლია, როცა მომხმარებელი კომპიუტერთან არ არის.
თითოეულ აგენტს საკუთარი იდენტობა, მეხსიერება, კომპიუტერული გარემო და სამუშაო სივრცე აქვს კომპანიის tenant-ში. სისტემა Microsoft IQ-ს ეფუძნება და Teams-ში, Outlook-ში, ჩატებში, არხებსა და დოკუმენტებში გამოჩნდება. მომხმარებელს მისი მოხსენიება კოლეგის მსგავსად შეეძლება.
ამ ყველაფერს თან ახლავს წვდომების კონტროლი, აუდიტი და ადმინისტრაციული მართვის მექანიზმები.
Autopilot-ის private preview თვის ბოლოს გაფართოვდება.
კონტექსტი, Plugin-ები და FinOps
Microsoft-ის ახალი Copilot-ის ერთ-ერთი მთავარი საფუძველი Microsoft IQ არის, რომელიც სხვადასხვა წყაროდან ბიზნესკონტექსტს აერთიანებს.
Fabric IQ უკვე ზოგად ხელმისაწვდომობაშია Chat-სა და Cowork-ში და მონაცემებიდან მიღებულ კონტექსტს იყენებს. Microsoft-ის ინფორმაციით, სისტემაში 20 მილიონზე მეტი Power BI semantic model-ის მონაცემებია გათვალისწინებული. Code-ში Fabric IQ-ის გამოყენება მალე Frontier-ის ფარგლებში გახდება შესაძლებელი.
მომდევნო თვეში public preview-ში Dynamics 365-ისა და Power Platform-ის მონაცემებსა და სამუშაო პროცესებზე დაფუძნებული კონტექსტიც დაემატება.
Plugin-ების registry-ში Microsoft-ის, პარტნიორებისა და თავად კომპანიების მიერ შექმნილი Plugin-ები გაერთიანდება. IT გუნდებს მათი ცენტრალიზებულად დამტკიცება შეეძლებათ. გავრცელება უკვე იწყება, ხოლო სხვადასხვა Copilot გარემოში ფართო ხელმისაწვდომობა უახლოეს კვირებშია დაგეგმილი.
AI-ის ხარჯების მართვისთვის Microsoft ორ ძირითად მოდელს გამოყოფს. USL ფიქსირებულ ფასზე დაფუძნებული ლიცენზიაა ყოველდღიური AI სამუშაოებისთვის, მათ შორის Chat-ის, Word-ის, Excel-ის, PowerPoint-ის, Outlook-ისა და Teams-ის გამოყენებისთვის.
UBB კი გამოყენებაზე დაფუძნებულ გადასახადს გულისხმობს და უფრო აგენტურ სამუშაოებზე ვრცელდება, მათ შორის Cowork-ზე, Code-ზე, Autopilot-ზე, ხანგრძლივად მიმდინარე აგენტებსა და Astra-სა და Fable-ის მსგავს frontier მოდელებზე.
FinOps for AI Agent 365-ის ხარჯების მართვას Code-სა და Copilot Managed Runtime-ზეც ავრცელებს. Copilot Studio-ს აგენტებისთვის შესაბამისი შესაძლებლობები ოქტომბერში იგეგმება.
ადმინისტრატორებს შეეძლებათ ხარჯვის წესების განსაზღვრა, API-ის გამოყენება, კრედიტების დამტკიცების პროცესების მართვა და მომხმარებელთა ჯგუფებისთვის ხელმისაწვდომი მოდელების ოჯახების არჩევა. მომხმარებლები კი Copilot-ში კრედიტების გამოყენებას, ნაშთსა და ისტორიას ნახავენ.
რა მოდის შემდეგ და როდის იქნება Ignite
Microsoft Home-ში Today-ის ახალ შესაძლებლობასაც ამზადებს. ის ფოსტის, კალენდრის, Teams-ის, შეხვედრებისა და ამოცანების მიხედვით ერთგვარ პროაქტიულ სამუშაო სივრცედ უნდა იქცეს, სადაც მომხმარებელს მომზადებული ტექსტები, დაგეგმვის ცვლილებები და შესასრულებელი follow-up-ები დახვდება. Today-ის private preview ოქტომბერში დაიწყება და მოგვიანებით Outlook-სა და Teams-შიც გავრცელდება.
@Copilot-ის ფუნქცია Teams-ში საერთო არხის კონტექსტსა და უფლებებს გამოიყენებს. ეს საშუალებას მისცემს გუნდებს, მაგალითად, სხვადასხვა დეპარტამენტის მონაწილეობით მიმოხილვებისთვის საჭირო მასალები და სამუშაოები მოამზადონ. მისი private preview Teams-ში თვის ბოლოს დაიწყება.
Microsoft-ის ამ ახალი შესაძლებლობების შემდეგი დიდი ეტაპი Ignite იქნება, რომელიც 17-20 ნოემბერს სან-ფრანცისკოში და ონლაინ გაიმართება.
წყარო: Microsoft
